mħabbra r-riżultati tal-ewwel sena ta’ studju fuq ir-riħ bħala parti mill-proċess għall-istallazzjoni ta’ wind farm fuq is-sikka l-bajda.

Waqt konferenza tal-aħbarijiet dalgħodu ġew imħabbra r-riżultati tal-ewwel sena ta’ studju fuq ir-riħ bħala parti mill-proċess għall-istallazzjoni ta’ wind farm fuq is-Sikka l-Bajda.

L-Ing Dr Tonio Sant mill-Istitut għall-enerġija sostenibbli mill-Università ta’ Malta waqt preżentazzjoni li għamel saħaq li r-riżultati tal-istudji tar-riħ permezz ta’ arblu (wind monitering mast) li ġie nstallat fl-Aħrax tal-Mellieħa, mifruxa fuq is-sena 2010 jidher biċ-ċar li r-riħ li hemm fiż-żona tas-Sikka l-Bajda huwa tajjeb biżejjed biex il-wind farm tiffunzjona.

Average monthly wind speeds (m/s)

	Nov. 09	Dec. 09	Jan. 10	Feb. 10	Mar. 10	Apr. 10	May 10	Jun. 10	Jul. 10	Aug. 10	Sep. 10	Oct. 10	Average
Aħrax (80 m)	6.41	10.03	9.40	8.98	7.21	6.98	7.80	6.47	4.94	5.17	6.16	6.65	7.18

Bir-riħ li ġie kkalkultat matul is-sena ta’ studju, il-wind farm tas-Sikka l-Bajda matul l-2010 kieku kienet tiġġenera madwar 200GWh ta’ eletriku li hu ekwivalenti għal 10.2% tat-total tal-elettriku li ssupplixiet l-Enemalta fl-istess perijodu. Dan l-elettriku ġġenerat ilaħħaq id-domanda ta’ madwar 40,000 familja.

Il-Ministru għar-Riżorsi u l-Affarijiet Rurali, George Pullicino saħaq li biex pajjiżna jilħaq il-miri stabbiliti, għandu bżonn jagħmel użu minn renewable energy mix, billi jkunu sfruttati r-riżorsi kollha possibbli bħar-riħ, ix-xemx u l-iskart. Il-Ministru Pullicino fakkar li pajjiżna hu obligat li sas-sena 2020, 10% tal-enerġija li jipproduċi trid tkun ġejja minn sorsi nodfa. B’dan ir-riżultat mill-istudji tar-riħ miksub, il-wind farm tas-Sikka l-Bajda kienet tlaħħaq mat-3.24% mill-mira ta’ 10%.

Dan il-proċess tal-istudji tar-riħ huwa biss parti minn proċess twil li jinkludi wkoll aktar studji ambjentali u ekonomiċi. Il-Gvern hu impenjat biex tkompli tinħoloq l-enerġija nadifa biex ngawdu minn arja aktar nadifa. Għalhekk il-Gvern qed jieħu numru ta’ inizjattivi f’dan ir-rigward fejn fost l-oħrajn:

• infetaħ il-kumpless ambjentali ta’ Sant’Antnin biex mill-iskart niġġeneraw enerġija nadifa,
• daħlet fis-seħħ sistema ta’ reġistrazzjoni tal-karozzi li biha ninċentivaw il-karozzi aktar ġodda, iżgħar, li jaħlu anqas u jniġġsu anqas,
• minn Lulju li ġej tidħol fis-seħħ ir-riforma fit-trasport pubbliku,
• tqassmu aktar minn miljun bozza energy saving lil 130,000 familja,
• 6,700 familja f’Malta u Għawdex f’dawn l-aħħar sentejn investew f’apparat li jiġġenera enerġija nadifa mix-xemx, permezz ta’ solar water heaters u panelli fotovoltajiċi,
• se jsir interconnector mal-Italja

Il-proġett tal-wind farms huwa għalhekk ħolqa minn kullana ta’ inizjattivi oħra, biex pajjiżna jkollna aktar arja u enerġija nadifa biex ilkoll ingawdu minn livell ta’ saħħa u ambjent aħjar.